In 2010 het Leon Albert ‘n album met toonsettings van gedigte van Uys Krige bekendgestel en aangebied in ‘n eenman teaterproduksie: Goue Eeue, ‘n Uys Krige Huldeblyk.

In dieselfde jaar het Leon as akkordeonspeler op die voorgrond getree as lid van Anteros, ‘n Mediterreense musiekgroep.

Leon het saamgespan met musikante van Kaapstad en omliggende townships en ‘n Afro-wêreldmusiekgroep, Sibanye, gevorm. In 2013 is hulle eerste album bekendgestel: “Sibanye” met oorspronklike liedjies van Leon wat al 11 amptelike tale van die reënboognasie omvat.

In 2014 het Leon die hoogste akkordeon kwalifikasie verwerf aan die Trinity College London: Gevorderde Sertifikaat met Onderskeiding. Hiermee vestig Leon hom as een van ‘n uitgelese groepie konsert akkordeonsoliste in Suid-Afrika.

Verdere musiek albums het gevolg in 2015: Cafe Late (solo akkordeon)

Sibanye het hul 2de album bekendgestel: “Sesifikile Ons Is Hier” met ikoniese Suid-Afrikaanse liedere en komposisies van Leon. Sedertdien het hy verskeie musiekproduksies saam met Sibanye op die planke gebring met optredes by kunstefeeste, gemeenskapsale, teaters en radio-uitsendings, soos Sibanye (2015), Mzansi-Skouspel (2016), Kaapse Klanke (2016), Saam soos Een (2017), Die Kaap is weer Frans (2018) en Alla wêreld ( 2019).

Hy het by die Keltiese musiekgroep Christine & The Kilts aangesluit en Skotse en Ierse musiekproduksies by feeste en teaters in die Wes-Kaap, Oos-Kaap en Gauteng opgevoer.

In dieselfde jaar stig hy ook die Cape Town Scottish Dance Band wat ceilidh en tradisionele Skotse dansmusiek verskaf by troues en Skotse dansklubs.

Hy woon ook die 2018 Summer School van die Royal Scottish Country Dancing Society (RSCDS) by in St. Andrews, Skotland.

Tydens die oorsese besoek in 2018 woon hy ook die Dutch Jazz Accordion Summer Course by in ArtEZ, Arnhem, Nederland.

Hy sluit aan by die Argentyse tango musiekgroep, Porteños en so is teateropvoerings soos Take Two and Tango en Buenos Afrika gebore.

Tydens ‘n besoek aan Castelfidardo, Italië in September 2019, neem hy deel aan die PIF akkordeon fees en ontvang ‘n Spesiale Internasionale Trekklavier toekenning.

Leon het ‘n gereelde gesig geword as trekklaviersolis by troues, partytjies en funksies.

As trekklavierspeler het Leon gedurende die FIFA Wêreldbeker-sokkertoernooi in Katar 2022 by stadions en Corniche-toeristegebiede verskyn as deel van die Kulturele Aktiveringsprogram van die Hoogste Komitee vir Aflewering en Nalatenskap.

As musiekdirekteur het hy ook saam met mede-liriekskrywer Shafi Mandottil (Indië), musiekvervaardiger Harold Schenk (Suid-Afrika) en die Qatar Youth Choir, onderskryf deur die Qatar Music Academy, saamgewerk in die produksie van ‘n verwelkomingsliedjie “It’s a beautiful game”.